头图加载中...

loading

2015東京、轻井泽

13
sfhang (香港) LV.16
2016-08-24 14:54 654/10
  • 出发时间/2015-10-15
  • 出行天数/7 天
  • 人物/和朋友
  • 人均费用/10000RMB

阿哥话佢唔系太锺意东京,我谂大部分初次去东京旅游而又唔系为买嘢嘅人都会有呢个感觉。人多车多,高楼大厦,迫迫夹夹,唔太放松。我以前飞过两次东京,一次主要为去横滨,一次主要为镰仓箱根,好似都刻意避免长留东京,就算喺东京都走去川越丶三鹰等近郊。
今次去轻井泽都系飞东京,过阿翁度之前有两日留东京,但我同大大都太懒啦,唔想再走咁远,留东京行下DISK UNION食下嘢咪算罗。而早半年前大大见到有个画插画嘅画D动物公仔好得意,又有出下书套咁,都讲话去东京嘅话不如去睇下,咁啱啦就去行下。
间嘢叫旅するミシン店,喺日暮里车站附近。日暮里站应该好多人都去过,由成田机场去东京市中会喺度转车。我地出车站经过民居後,见一条好阔嘅行人路同车路,两旁种各种一大排大树,人车皆不多,偶尔有人拖狗散步,好舒适嘅散步区。而两排树後,一大遍墓地。我地系下午经过,都几安详平静而毫无阴森之感。
我见一指示牌写住德川庆喜之墓,我问大大系边个,佢话唔知系咪德川末代将军。我上WIKI睇下,话系第十五代喎,大大话第十五代咪即系末代罗。大大真系咩都识。
过左墓地,沿路有D小店,例如卖米饼嘅木建筑老铺,唔同口味嘅烧米饼放入一个个木箱,木箱对外一面换上透明玻璃/胶板,好吸引。又有间转角嘅旧式日本CAFE,有几个人客排成人龙等位,当中更有鬼佬游客,好似好坚咁。
不过我地冇去八挂,因为行左一大轮我都未搵到间嘢,怀疑行错路。我开google map睇下,顶,我地完全错晒,一开始车站出口就错左,如果出啱,行5分钟就到了。又不过,如果出啱,我地都睇唔到上述东京少见嘅平静。

我同大大自己去旅行好少买上网卡,多数都系乞WIFI,穷拈嘅浪漫。唔想买上网卡有好多原因嘅,一来乞儿啦,东京的确好多地方都有WIFI,冇卡都唔死得人,而且旅客更有特别待遇,大大搵到可以去果D旅游查询counter度拎wifi密码卡,收得都几好,上次去箱根仲要有绫波丽特别版。

二来我唔系好相信自己控制到上网时间。平时喺香港坐车,明明都谂住专心d听下歌,听唔够半首就拎部电话出来loop facebook,我唔想去旅行都系咁。不过去完今次我发觉异地嘅新奇加上旅行嘅氛围战胜左fb。

因为今次各有各去,去到又会约返一齐玩,始终都系买左卡方便d。亦因为咁,我同大大喺日暮里行到唔知去左边嗰时,我终於可以去google map搵下路。

当我地重回正轨後,细心留意下日墓里呢区,真系好舒服好好行。我地根据google map由大路转入好似民居後巷嘅一条小路,柳暗花明,两边随左有d日用品店,间唔时会爆间个性小店如卖自己设计嘅小首饰丶陶瓷丶二手书店,或喺一空间小如香港卖鱼蛋小食嘅铺位做画展,喜出望外。

而我地要去嘅旅するミシン店无啦啦就喺面前出现。铺头冇特意装修到好文青,只系好平实咁喺店中间放左张大台,台上放有唔同size唔同公仔嘅书套,右边靠墙放上琳琅满目嘅postcard同有佢画插画嘅书,左边系收银同工作间咁上下嘅嘢。无刻意要全木家俱,亦无其他多馀嘅装饰。我就系卖我画嘅嘢,系咁多。

佢d公仔全部都好得意,大大更指出有d系玩食字,如狐狸食狐狸寿司(腐皮寿司)丶白鸽整鸠饼等。各个角色亦有设定,好似只熊好锺意食甜嘢,而只猫呢就系卖冬甩嘅,大大真系咩都识。

我地拣左两个书套丶postcardssssss同条布条去埋单,怀疑就系该插画家嘅姐姐同大大倾左几句。两个都好似好怕羞但又觉得礼貌上要social下嘅人喺度吹水,我喺旁边扮睇下其他嘢而实质系食花生。

终於social完嘅大大出门口时松口气,不过whatsapp左肥佬都系决定屌个tote bag俾佢,所以行左过两个街口之後又返返去,比第一次走嘅时间更尴尬......肥佬个tote bag好可爱,仲要系亲手用水笔画上去。当姐姐知道我地系送俾人,佢仲好似《love actually》里面Robin Driscoll (Mr. Bean)上身咁包礼物,包到好靓靓咁俾肥佬。

食居酒屋嗰晚,我地约左BALLED,S哥同肥佬第二日去食东池袋大胜轩,之後再去代官山SVB饮啤。一出代官山站,哗顶,吸啖空气都觉得特别潮,好唔似我等穷拈会去嘅地方,显得格格不入。

好在,有S哥。你睇S哥嘅背影,就算佢喺代官山咁潮嘅地方,都好似漆黑中嘅萤火虫一样咁鲜明咁出众。连美国潮人Nick Wooster都因为S哥会去SVB而特登去LOG ROAD 边做访问边等S哥。不过经我地多番说服,S哥都系唔肯同佢来张世纪张合照。可能S哥觉得Nick Wooster抄佢形象挂。

代官山SVB可能好多香港人都识,因为杜如风喺《东京攻略》有介绍过。唔......我梗系冇睇过啦哈哈哈,我又唔系阿耀,我点会睇过。不过我确实有次唔小心咁立下眼见到佢介绍间餐厅食炸鸡翼好似好好食咁。我同大大去过尖沙咀嗰间食名古屋嘢嘅山哥居酒屋,炸鸡翼送酒真系太监骑马。咁我plan下东京去边鸠行下嗰时,咪搵下间鸡翼喺边。

但系可能我太眼训(返N呀嘛),我搵到唔系龙虾包,就系呢间啤。算啦,啤好呀,去旅行唔饮啤有咩好做。之前去过九州Asahi同惠比寿啤酒纪念馆,Asahi正在一蚊都唔使俾参观完就有3种啤你饮,Yebisu则正在500yen就饮到一杯新鲜贵价Yebisu(仲有六个tap)。两次经验都非常好,日头都未落就唔太行到直线。

SVB(Spring Valley Brewery)系近年手工啤大行其道之下嘅产物。细厂玩手工啤玩到出神入化而且逐渐打入主流市场,大厂如麒麟啤都开始参一脚,喺横滨同代官山开设酿造同时售卖手工啤嘅餐厅。呢半年喺香港7仔我地都可以买到Asahi嘅Pale Ale丶Porter同Saison,可见日本大厂推手工啤推得几用力。

我地五条友,穷拈叫得3 set图中呢个有晒六只味嘅啤酒set来share,小食仲要叫得两set。咁前一晚d酒气未过呀嘛,同埋我地试过晒後,每人再叫杯自己最锺意嘅慢慢饮。

啤当然好饮(除左最右嗰杯jazzberry),嘢食都好鬼正。由於我地个胃喺来之前已经塞到八成满,我地只能够叫左个肠同芝士盘。眼见人地又ribs又fries咁,鬼叫你唔系阿哥。

嗰度气氛好好,可能空间够大,餐桌唔会拍得好埋,饮到咁上下愈倾愈大声都唔会嘈到人。我地去到,刚好有位,个黑人姐姐仲同我地讲话因为我地冇订位,唔知最迟坐到五点介唔介意呢?当时只系两点。

大大唔系好锺意玩机动游戏,近年我都冇咩去过乐园玩过呢味嘢。系我刚quit领队佢又未开始做嘢嗰次去关西,佢俾我迫左去环球影城一次咁大把。我嗰时以为冇几何有机会去日本架嘛,日本wor,乐园wor,咁难得梗系想去下架。点知而家d人去日本去到好似去台湾咁易,有d人特登去结婚都算,仲有d人系会去成个月都唔返。

嗰次去环球影城唔系好多人,d野好快排到入去玩。蜘蛛侠好好玩,令我对机动游戏有个全新体会;音乐过山车好刺激,虽然个名好流,而椅背上嘅音乐我都好似冇得拣,但真系好刺激。

不过点刺激都好,都唔够我今次玩嗰个刺激。我冇去乐园,我只系join埋同老爷一齐由东京轻井泽。老爷租架八人车,六个人,无数嘅行李,google map缓慢嘅反应,东京市内交通嘅繁忙,唔熟悉嘅转弯交通条例再加上都市人嘅燥底......刺激过玩富士急嗰个。嗰d最多都系吓到个心离一离,呢d系会个灵魂离一离。

有惊无险,我地好安全咁去到轻井泽。喺嗰度嘅三日两夜,真系用S哥名句,唔知搞过D咩又过左三日。当然最大件事系阿翁婚礼,但明明占一段仔时间啫,其他时间好似冇咩去过边咁。

可能系因为图中呢个outlet......我同大大都未去过outlet,就算去到箱根都系将时间放晒喺景而冇去outlet。穷拈嘛,去outlet都冇钱买架啦。但系呢个轻井泽outlet都真系够晒夸张。一大遍草地,有红叶,仲有湖。图中个叔叔系喺度画紧画呀大佬。一个outlet冇用尽每一片空间租晒出去卖嘢,而系俾左好空旷嘅地方俾人休息丶放狗丶碌地。

好舒服。舒服到令你好想购物。顶。

轻井泽云场池嘅红叶红得夸张,蜷川实花咁样......

我地入左间卖一小樽小樽酱嘅店铺,见到有日式布丁(即系黄色个底有层焦糖嗰只)
好似都成六百几YEN。见佢系整酱专门店,我地估布丁应该都会好食,贵少少都买两樽返去试下。

一食,哗屌,咁拈甜咁拈杰嘅?完全唔系平时食果种滑嘟嘟质地。唉,可能我地穷拈唔识嘢,贵嘢系咁食。我地本住呢个心态食左大半,大大终於忍唔住拎起个樽来睇......

"佢系酱来架......"

本篇游记共含3477个文字,10张图片。帮助了游客。 举报

就按你的路线玩了!

2016-08-24 18:34

2016-08-24 20:39

引用 狗哥 发表于 2016-08-24 18:34:08 的回复:

就按你的路线玩了!

回复狗哥:有幾個點挺值得去看看

2016-08-25 04:17

引用 kc56 发表于 2016-08-24 20:39:10 的回复:

回复kc56:謝謝你哦

2016-08-25 04:17

引用 sfhang 的图片:

7D

2016-08-25 16:55

引用 牛百山 发表于 2016-08-25 16:55:43 的回复:

7D

回复牛百山:風景很美的OUTLET

2016-08-26 02:35

楼主游记写的真好,膜拜

2016-08-29 13:52

引用 moxiao 发表于 2016-08-29 13:52:43 的回复:

楼主游记写的真好,膜拜

回复moxiao:謝你哦~~

2016-08-30 03:17

轻井泽属于东京架?

2016-11-04 14:14

引用 键 发表于 2016-11-04 14:14:18 的回复:

轻井泽属于东京架?

回复键:輕井澤町是日本長野縣東部的町

2016-11-05 03:33
返回顶部
意见反馈
页面底部