头图加载中...

loading

带米其林游澳门

  • 出发时间/2016-11-13
  • 出行天数/2 天
  • 人物/带小孩
  • 人均费用/1150RMB

米其林10个月了~~我一直希望等佢1岁后就带佢出国短途旅行,所以趁住11月庆祝结婚两周年,我地就先带佢去澳门短途玩两日。

依家由广州澳门可以坐轻轨或者大巴到拱北口岸,亦可以自驾。但因拱北太多人过关了,而我地由屋企去高铁站又好远,而且之前听同事讲横琴嘅停车场停一日先20蚊,咁啱我booki嘅金沙喜来登酒店系近横琴口
岸,所以我地决定自驾到横琴口岸停车后再过关。

坐好安全座椅,出发了!

我地大概08:00系屋企出发,买咗kfc早餐,去油站加油,然后由西塱个油站出发大概08:30,大概10点就到横琴口岸停车场。

横琴口岸嘅停车场系露天嘅,据说有成千个车位,但由停车场行到出入境大楼要接近10分钟,我地推住bb车行会耐d~~

背后系横琴旧出入境大楼,依家做停车场嘅地方系以前车辆出入境嘅地方~~

虽然我港澳通信证已经系芯片卡,但因为我要带住bb过关,系唔可以行自助通道,就要去普通通道嘅专为老人、小朋友陪同嘅通道,但我和米其林比我老公仲快,因为自助通道要扫两次,都几慢噶~~入澳门关都一样~~不过横琴真系好少人!!!

不过系中国出境后,要坐接驳巴士经过莲花大桥到澳门先办理入境,接驳巴士5蚊一个人,俾澳门币、人民币和港币都得,都系5蚊。

澳门入境后,就经过天桥过到停车场排队等酒店车,都有工作人员维持秩序,问清楚工作人员队伍系边个酒店嘅,唔好排错队啊~~

我今次book嘅系喜来登金沙城中心酒店,系出发前已经邮件联系过酒店,而且我系SPG会员,所以11点几到酒店后,我就去会员专柜问下可唔可以提前入住(澳门酒店入住时间都系下午3点),好顺利咁就check in了~~不过搞掂晒都已经12点了,米其林开始扭肚饿,佢平时11点半就食中午餐辅食~~我就头痕去边食lunch,帮我check in嘅服务员就推荐自助餐优惠俾我,话7折,计埋服务费194澳门币,折翻人民币同系携程等网站买嘅优惠券差唔多,所以我地决定就自助lunch啦~~

然后就兵分两路,老公先上房放好行李,我就同米其林去餐厅先~~

国际五星系澳门嘅服务同系清远嘅服务系唔同噶~~我地一入餐厅,服务员见我推住bb车,就即刻接手帮忙推车,仲问要唔要bb凳,搬完bb凳来又帮我抱米其林上去坐好,又跟住问要唔要bb餐具~~

张bb凳好舒服,同国内餐厅d真系差得远~~就算同系喜来登旗下嘅清远狮子湖喜来登酒店自助餐厅d服务和设施都冇咁好~~

P.S.米其林嘅午餐辅食系我之前煲好嘅番薯粥+嘉宝南瓜泥,我早上系屋企出发前用辅食机加热好后装入保温壶,喂食前倒出凉一阵就食得啦。

米其林食完就到我地食了~~长脚蟹好新鲜,特登俾米其林摸咗一下,佢个表情好得意~~仲有青口和螺都好大好新鲜,其他熟食就有东南亚美国意大利特色,有寿司,但中午就冇刺身~~

到我地食嘅时候,米其林又想食,好彩餐厅配咗剪刀俾我地食蟹时用,我就攞咗d西瓜剪到好细粒俾佢食~~到我地食到一半,大概1点15分,米其林就扭眼瞓,我地放翻佢入bb车,塞翻个奶嘴,推咗两下bb车,佢就瞓咗了~~

然后我地继续食甜品啦、雪糕啦(哈根达斯噶)~~

因为米其林瞓咗,所以食完后我地就上房休息,打算等佢瞓醒再出发。翻房途中就顺便逛咗一下金沙城,依家推紧功夫熊猫一个活动,有d摆设俾游人影相,中午时间系正门仲有只人扮功夫熊猫同大家影相,可惜米其林瞓咗啦~~

我地住嘅系浩天楼嘅单号房,系房就可以睇到巴黎人嘅巴黎铁塔了~~

大概3点,谂住米其林差唔多醒,我地就出发了。由浩天楼系可以坐电梯到金沙城嘅shopping mall,果度有奢侈品牌,亦有Zara和佐丹奴。我地两个就系佐丹奴见到399澳门币两条裤,就被吸引入去了,系果度逛咗一阵,买咗d裤、皮带、袜,跟住米其林就醒了。

然后我地就问佐丹奴嘅店员点去官也街方便,店员教我地由金沙城和四季名店城联通嘅天桥过到四季名店城,然后过威尼斯人西翼大堂出去,过马路到澳门银河果边,再向前行就到官也街了,大概半个钟。

因为原本我地都打算到果个天桥嘅view point影相,所以就选择步行过去。先整翻张一家三口合照,庆祝结婚两周年~~~

原本想影张米其林和巴黎铁塔亲密d嘅,就放系个模型旁边影下啦,但老公嘅摄影技术真系唔得啰,搞到个铁塔冇咗个顶~~

威尼斯人西翼大堂出去,过马路去澳门银河果边后,唔使行入银河,就系沿住行人路向前行,见到个巴士站就望过对面见到氹仔牌坊就可以过马路,牌坊后两条路都系通向官也街~~~

无论去台湾好、香港澳门好,我都系钟意搵依d旧建筑~~~

佩服澳门d司机可以系咁窄嘅路度开车~~~

其实官也街好短,只有百几米,只不过系一条巷仔,两边都系手信店和食肆。我地就去周边逛咗一下,感受一下澳门建筑特色。

原本想试下大利来记嘅猪扒包,但要68澳门币一个套餐,就一个包+饮品,觉得唔系好抵,所以冇食了,试咗莫义记嘅芒果大菜糕和榴莲雪糕,都ok嘅~~

晚餐我地打算食葡国菜,之前系网上查过最多人去嘅系公鸡葡国餐厅,不过我见店面比较细,估计里面比较窄,唔适合带bb入去,所以我选择咗系官也街口有三层楼高嘅木偶普通餐厅,不过都几贵噶。例如下图依份例牌葡国咖喱鸡都要128澳门币,有一只鸡翅、一只鸡腿和两旧鸡,味道应该都算正宗。间餐厅都好多人,特别系d比较多人嘅聚餐。

P.S.米其林嘅晚餐辅食我准备咗系京东超市买嘅喜宝嘅胡萝卜大米全餐泥,里面含有胡萝卜、牛肉、大米成分,只要用热水泡暖一下就可以喂食了。一罐分量相当于200ml左右啦,我另外再加咗两勺米糊,基本上够米其林食。

系木偶葡国餐厅我地只系叫咗一份葡国鸡和一份炒饭,埋单都要200多d澳门币(含服务费)。因为原本就打算系诚昌饭店打包水蟹粥翻酒店宵夜,所以我地冇叫咁多菜了。

诚昌饭店里面都系比较细,有d市内大排档嘅感觉,都唔适合推bb车进入,所以我地决定打包系正确嘅。我地买嘅系180澳门币嘅细水蟹粥,两人分量,用两个大碗打包,里面分别有一只蟹脚和一只蟹钳,大概一份就系一只蟹,味道和分量都唔错。

买完粥后,我地又经银河步行翻酒店,顺便去银河嘅apple store买部电话。想买7 plus要先上澳门官网预约到店先有得买,不过玫瑰金、土豪金和黑色基本都有货。

银河果度有个类似水晶柱嘅装饰,对于米其林来讲,好新奇~~

临近圣诞了,各大酒店商场都有圣诞装饰,apple store对出位置有一棵巨型圣诞树,旁边仲有好多巨型装饰,好得意,好适合同小朋友影相。

不过唔知系咪因为夜晚,米其林觉得有d惊啰,都唔敢摸,一定要我地抱住~~

因为喜来登金沙城中心酒店附近都系酒店和工地,冇咩特色小店,所以我地都系选择系酒店食自助早餐,7折后含服务费173澳门币一个人,早餐来讲,我觉得贵d啰,不过冇咩其他选择,除非去M记啰。

P.S.米其林先系房食完早餐奶,跟住我地再落去食早餐。米其林嘅早餐辅食系美林嘅豌豆泥+半只蛋黄+少许馒头,因为酒店自助早餐有水煮蛋和馒头,所以早餐其实可以唔使准备,只不过为咗佢食多d蔬菜类嗟。另外盛宴嘅自助早餐仲有提供瘦肉粥和鱼肉粥,而且冇咩咸味,应该系冇咩盐,我觉得可以俾米其林食,所以就装咗d鱼肉粥系保温壶作为米其林嘅午餐了。

食完早餐饱饱就紧系运动下,今日嘅任务就系逛威尼斯嘅大运河~~其实系寻日嘅天桥入咗四季名店城后,旁边就有个出口出去,系另外一条联通威尼斯人嘅桥,通过果度可以到达威尼斯人正门嘅广场。

威尼斯人紧系要系正门大堂签翻个到啦~~

其实我地9点左右到大运河购物中心,d商铺都未开,而且人唔多,好适合影相啰~~

其实三段运河景都系差唔多,我地只系影咗其中一段啰,到9点半多d,米其林就扭眼瞓了,就放低bb车靠背,塞个奶嘴,推住行一阵,佢又瞓咗了。

然后我地就逛下另外两段,等10点d店铺开咗后系屈臣氏买咗d嘢,跟住就翻酒店执行李check out。check out就使用咗快速退房,因为我系用信用卡做押金,放低房卡就走得了。果阵已经11点几了,我地就到金沙城嘅food court食午餐,等米其林食埋午餐辅食,我地就坐酒店巴士到关口走了。

再次强调,横琴口岸真系好少人,我地由澳门离境到横琴停车场都系大概半个钟。

总结一下今次带B出游:
米其林其实系出发前两日都发紧烧,因为周三打咗乙脑疫苗,当晚就烧到39度几,而周五中午仲有几分烧,我原本就打算如果周六早上仲有烧就推后行程,好彩系佢周六早上冇烧。不过我都系准备好了探热器、美林退烧药、保婴丹、小林退热贴。小林退热贴提前一晚放咗系雪柜,跟住早上攞出来后放系一个焖烧杯里面保冷,因为我原本就打算带多个焖烧杯,以防米其林唔肯喜宝晚餐泥果阵可以即刻焖d面俾佢。

带b出游,攰并快乐…虽然研究话要3岁后先会有记忆,但我觉得就算依家去无记忆,但佢都可以接触唔同嘅人,唔同嘅语言…途中见到d差唔多大或者甚至大过嘅佢嘅bb,一系要背住瞓,一系扭抱,但佢可以好乖咁眼瞓叫两声话我哋知,等我俾个奶嘴咬住就自己瞓,我哋继续食饭行街…抱住佢睇嘢明显系开心过坐车仔,但放翻落车都唔会吵…不过带b出游尽量都按翻佢嘅食和瞓时间,该食嘅时候食、该瞓嘅时候瞓,咁佢就自然冇咁扭计噶啦。

重点来了:横琴口岸停车场收费是3元半小时,24小时60元封顶,传说的20元一天已经一去不复返了。

本篇游记共含3768个文字,35张图片。帮助了游客。 举报

出去玩总有好心情~

2016-11-17 14:56

楼主你的行程安排可不可以发给我呀我做个参考。

2016-11-21 14:53
相关目的地:
236876张照片
相关目的地:澳门
游记目录
返回顶部
意见反馈
页面底部